警方無口齒亂爆料搞到粉嶺中華基督教會基新中學雞毛鴨血，亦令好多人對呢間《逃學威龍》現實版嘅學校有興趣，如果想參觀吓呢間被警方選中派卧底嘅中學，家有機會嘞，因為基新今明兩日舉行40周年校慶開放日，除咗可以在校園內四圍參觀，亦有攤位遊戲同學生才藝表演，如果警方行動已經告一段落，即係學生之中已經冇卧底，大家唔好諗住去到可以見到卧底警花。
有40年歷史嘅基新慘遭警方賣豬仔，真係一個污點，難怪校長郭燕薇痛斥警員無口齒，令學校聲譽受損，雖然保安局局長李少光、一哥鄧竟成先後向學校道歉，不過大錯鑄成，高官講幾句說話好難補救。