噚日講過大市玩「迷蹤拳」，結果指數喺早市「扮死」，高開後變全朝高位，以為要回，點知下晝喺內地全無動靜下再挾升，可惜成交欠奉，扣埋中國森林（930）近9億元成交，全日得700億元。升市成交跌，收市後期指轉玩低水，狀甚古怪，指數玩唔過，反而炒落後仲有水位。
中央消息日日變，風向難以觸摸，但不變嘅定理係，當弱過弱煲嘅中國移動（941）起動，其他落後板塊冇理由原地踏步。內房股終於披甲再上路，由9月到家靜足3個月，升番啲唔應該意外，就以中國海外（688）為例，連升4日，技術走勢轉靚，輔助技術指標又冇背馳，10日線將要出現黃金交叉，種種表面證供都係話︰「你買我啦。」不過要打屁股係成交唔足，噚日焦點炒內房，身為內房龍頭成交竟然縮，好可能資金已靜靜換馬炒二三線。
廣船有起色 可炒波幅
目前有4隻內房股首11個月銷量已超標，分別係碧桂園（2007）、世茂房地產（813）、中國海外同綠城中國（3900），當中只有世茂技術上仍未走樣，但要面臨三頂阻力約17蚊，破埋位就前途無限，因為蟹貨無多。但有炒過佢都知股價走勢係「快閃黨」，即使破位，睇定啲冇壞。高處未算高仲有「內房雙龍」嘅龍湖地產（960），上市11日，唔多使震倉已創新高，冇得估頂；另一條寶龍地產（1238）收貨個多月，只要突破2.80元就有運行。
唔想高追但又沽咗貨手痕，搵超跌股亦未嘗不可。工信部話未來3年中國造船業面臨嚴重產能過剩，不過隨着經濟不景，亞洲成為最大造船地區，中日韓3地佔世界總量九成以上，當中中國最大，按規劃明年將佔全球35%。雖然產能過剩，勝在有阿爺包底，中央已計劃重組造船業，鼓勵大型企業併購中小企。「國進民退」，作為中國船舶工業集團上市公司嘅廣州廣船（317），重組後會係佔70%市場份額嘅十強之一。股價有番啲起色，但仍未能升穿下降軌頂部14.20元，短期再唔穿，就有機會回試十一二蚊再彈過，炒波幅就係咁簡單。
學識睇圖，就可以兩手準備，「升穿買得，跌唔穿買亦得，得咗。」
胡孟青