由彭氏兄弟執導、郭富城和鄭伊健主演的電影《風雲II》，下周四正式上映，今次戲中加插了蔡卓妍（阿Sa）飾演的第二夢一角，扮演鄭伊健情人的她，與伊健只靠書信談情，兩人初見之日便是分離之時。她拍攝一場凌空360度兩周半迴旋的吊威吔戲時，更慘被割傷手和腳踝。
蔡卓妍和鄭伊健過去曾5度合作拍戲，今次兩人在《風雲II》中再度合作，飾演一對感情微妙的情人，劇情講述阿Sa因臉上有疤痕，一直不敢與飾演聶風的鄭伊健見面，兩人一直只透過書信溝通，藉文字上建立了一段情緣。
靠書信談心
再與阿Sa演情侶，伊健笑說：「喺《風雲雄霸天下》入面我鍾意嘅唔係小師妹，而係第二夢，但劇情冇交代，今次拍第二集第二夢出現咗，我哋係靠書信談心嘅，但第一次見面之日就係離別之時，因為我要入魔道，大家都唔知會唔會有機會再見面。家嘅人可以成日見面同MSN，但係古代啲情侶好耐先可以見一次面，甚至第一次見面就唔知幾時先可以再見，呢種感覺好有趣同好難忘。」
伊健又笑言拍《風雲II》，對阿Sa的演技有很大考驗，因為她是第一次拍大型古裝特技片，還要飾演個性比較成熟的少女，有很多內心戲。不過阿Sa為拍此片真的很努力，即使因拍攝吊威吔鏡頭被割傷手及腳踝，仍然毫無怨言，繼續死撐拍攝，令導演大讚她夠專業。
不介意受傷
該片動作指導馬玉成其實十分小心，每一個動作鏡頭都會很小心試幾次位才正式拍攝，以確保演員安全，沒想到阿Sa還是意外受傷，對此她說：「馬玉成係一個好幽默嘅人，亦都好愛惜演員，意外就係意外，我割損咗雙手大家都好緊張，佢又不停咁自責，我就同佢講話自己係特別嘅一個，意外專門發生喺我身上，叫佢唔使太介意。」
撰文：葉雪
