Angelababy（楊穎）前晚出席《花田囍事2010》煞科宴，早前本報踢爆她與黃曉明於北京唱K撻着，其間二人更離奇失蹤兩粒鐘，她前晚回應時直認與黃曉明曾見面，更表明不會抗拒異性追求。
導演黃百鳴前晚率領楊穎（Angelababy）、古天樂、鄭中基、吳君如、熊黛林、夏春秋（冬叔）和李香琴等，在旺角出席賀歲片《花田囍事2010》煞科宴。熊黛林避談與郭富城緋聞，中途離場。
君如教中基偷食
本報日前踢爆Baby在北京與內地型男黃曉明相約唱K，其間二人又離奇失蹤兩粒鐘，她前晚回應說：「我係見過佢，唔知點解咁傳。」問二人可有發展空間，Baby說：「目前專注工作。」是否激嬲了緋聞男友陳偉霆（William）？Baby說：「應該唔會嘅，已經好耐冇聯絡，我哋一路都係普通朋友。」問到Baby可抗拒其他異性追求？她說：「都唔會抗拒嘅，不過我都冇時間啦。」
鄭中基近日傳因拍《花》片和Angelababy撻着，君如既與鄭中基合作《花》片，又跟他的女友蔡卓妍（阿Sa）合演電影《美麗密會》，她笑言做大家的間諜，更即場踢爆鄭中基沒新意，只送相機和手袋給阿Sa做禮物，她說：「一啲心思都冇，真係把鬼。」
君如提議阿Sa下次御准鄭中基出去滾做生日禮物，他雀躍說：「咁要白紙黑字簽咗先，否則唔認數。」
此外，Baby昨日在中環主持首飾店開幕時再度否認緋聞，她說：「又鄭中基又黃曉明，大家都知兩個都冇乜機會，我都冇同黃曉明去北京唱K，只係朋友聚會見過，有打招呼。」
狂讚黃曉明靚仔
Baby指緋聞惹來經理人Kim狂哦，不過她仍不忘大讚黃曉明靚仔，又讚鄭中基夠搞笑。
採訪、攝影：藍文浩