周杰倫（Jay）早排同靚女林志玲拍攝電影《刺陵》，口花花狂讚對方係完美女神，搞到身邊班緋聞女友呷晒乾醋。不過，平日將感情事收收埋埋嘅阿Jay，近日盛傳同緋聞女友江語晨同住一間酒店噃！
事緣有讀者發現阿Jay喺美國下榻酒店嘅房間照片，居然同江語晨喺blog度放嘅房間照片嘅擺設差唔多，其中嘅梳化、枱燈同窗簾嘅款式同顏色都一模一樣，懷疑佢哋住喺同一間酒店。
欽點做女主角
其實阿Jay同江語晨嘅緋聞傳足兩年，當時阿Jay親自邀請對方唱《不能說的‧秘密》插曲《晴天娃娃》，最近仲欽點女方擔任佢套新劇《熊貓人》嘅第一女主角。對於兩人疑似同居，阿Jay所屬嘅杰威爾音樂噚日「循例」澄清：「杰倫世界各地跑，住過飯店何其多，只能說網友想像力很豐富。」至於江語晨所屬巨室音樂企宣總監鄭中庸就話好多飯店房間佈置都好似，夾硬話係同一間比較牽強喎。