立法會工務小組噚日一如所料通過逾600億元嘅高鐵撥款，議員以12票贊成、8票反對及1票棄權造就一隻舉世無匹超級大白象，工程界議員何鍾泰被指有利益衝突，為勢所逼唔投票，同樣被指有利益衝突嘅地產及建造界議員石禮謙則缺席，不過佢唔係避嫌，而係避過一劫。
原來石禮謙星期一心臟病突發要入院通波仔，手術後要休養，所以噚日唔能夠開會舉手，佢話檢查發現佢三條血管都塞咗九成半，仲危急過早前財爺鬍鬚曾急性心臟病發，好彩及時做手術先避過一劫，否則十分大鑊。
心血管共14個支架
鬍鬚曾通波仔要留醫一星期，石禮謙噚日已經喺屋企休息，事關佢已第六次通波仔，習以為常；對上一次今年7月通完，事隔唔夠半年血管又塞過，情況有幾嚴重可想而知。佢同八方講，歷年來通波仔多次，身上已有五個血管支架，今年7月加多六個，日前再加多三個，家陣心臟血管總共有14個支架！
雖然心臟病嚴重，不過石禮謙睇得好開，噚日錯失投票機會，今個月18號立法會財委會正式表決撥款時佢一定會出席投支持票，自己條血管通咗，最好高鐵都盡快通車咁話，「值得支持嘅事，就應該要做。」對於被指擔任大財團要職，支持興建高鐵涉嫌利益衝突，石禮謙話太過上綱上線，所謂潛在利益「間接到阿媽都唔認得」，如果咁都要避嫌唔投票，工聯會議員也不應投票，「佢哋支持興建高鐵，好多工人有工做，好多着數喎！」
陳偉業冇阻人發達
咁講法通唔通呢？八方唔敢同石禮謙爭拗，怕刺激到佢心臟有事，之不過佢越講越好氣，解釋被指有利益衝突時中氣十足，八方相信佢18號一定可以投票。
何鍾泰、石禮謙無奈冇得投票，社民連陳偉業則選擇性投票，佢反對撥款興建高鐵，至於傾到賠償20億元畀原居民、大地主嘅撥款申請時，陳偉業就以不滿已經通過撥款興建高鐵為由離席而冇投票，並冇阻人發達。
mailto:[email protected]