曼谷A突然回港，與左丁山打個招呼。自己去曼谷渡週末冇通知佢，點知一個星期之後佢竟然嚟咗香港，大家碰上了講起此事，曼谷A話：「點解你去曼谷唔搵我？」無言以對，有時去得太匆忙，唔想煩親朋友啫。眨吓眼，佢已移民曼谷十九年，變身為泰國地產/基建專家，成個泰國人咁模樣，與泰國太太過二人世界，甚為安樂。原來佢位大千金在美國布朗大學畢業後，留美繼續讀博士，二千金在美國讀完學士、又入咗WakeForest大學（即係NBA球星鄧肯嘅母校）讀醫學院，即係話兩位千金長期留美不返，曼谷A夫婦兩人要自己搵節目。仔女讀書麻麻，父母擔心，但佢地讀書叻呢，長期在外留學，有排供，父母可能又會驚住「千斤擔子兩肩挑」！此次曼谷A隻身回港，係為咗參加十一月二十八日之新亞校友日，以及二十九日晚之新亞六十周年院慶晚宴，早已約定同班同學重聚。會唔會在十二月十三日又返嚟參加中大校友日呀？曼谷A話從網頁得悉此事，不過到時已經返咗曼谷，恐怕冇時間再回來了。
可惜也。一年一度之中大校友日於十二月十三日舉行，是日剛好係國泰香港盃大賽，沙田馬場會成為世界馬圈焦點，但好多好多中大校友唔參加賽馬嘅啫，大可回沙田校園見番舊同學兼參加活動，例如「祝賀高錕教授榮獲諾貝爾獎特備講座及展覽」，回到課堂精選講座，劉校長講"LessonsfromtheFinancialCrisis"，心理學系講座教授梁耀堅講「教你如何不憂鬱」，中醫學院林志秀教授講「如何運用中醫藥和食物提升情緒」，中大中草藥園顧問游中驥先生導賞講解「校園樹木」。鍾意靜啲嘅，可到文物館觀賞「北山汲古：利氏北山堂捐贈中國文物展」：繪畫、陶瓷、雅製、書法、碑貼、銘刻。工程學院準備咗「虛擬解剖」、「虛擬針炙」、「自動人臉識別系統」、「數碼漫畫系統」、「機器人視覺的書法學習系統」等等示範。法律學院有模擬法庭。此外還有不少嘉年華攤位及兒童節目，上中大網頁就可搵到。校友日呢回事，美國大學畢業生非常重視，不久前在中環街頭碰到資深銀行家桂徵麒（RandolphC.Kwei），佢話要返耶魯大學參加畢業五十周年校友日，餘事暫且放下。Randy二十七年前已是美國運通銀行高級副總裁亞洲主管，今年出版一本自傳EasttoWesttoEast:JourneyofaUSTrainedChineseFinancier，可以講話係半本國際金融市場風雲錄。