《信報》主筆練乙錚噚日喺專欄透露，不久嘅將來就會封筆，唔再寫嘢。練主筆話原來早喺10月底，董事會就同佢傾下年度續約事宜，但佢只答應寫多一陣，確實封筆日子未定。兩年前嘅12月練乙錚重返《信報》執筆，佢話自新管理層，即小小超入主之後，公司至今一切運作暢順，已經步入穩定發展而無後顧之憂喎，所以就將封筆一事公告天下。
練主筆話封筆之後，希望重拾暫時放低嘅私事同興趣。早前聽聞佢有意放低工作後揸帆船環遊世界，但八方向佢求證就話冇咁嘅事。點都好，佢亦有鋪後路，話如果有重要事發生，或者能力應付得嚟，會用「特約評論員」名義再為《信報》寫稿，練乙錚嘅粉絲唔使太失望。