有歐洲股神之稱嘅AnthonyBolton今年三月過咗六十歲生日，本已決定退休，事實上，佢自兩年前開始，已不再活躍，不再為基金客戶選擇股票，掛名做富達（Fidelity）投資總裁，只係畀吓大方向、策略性意見啫。佢有歐洲股神之稱，皆因佢居於倫敦，從一九七九年到二○○七年共二十八年間，佢負責嘅英國註冊基金嘅每年複利回報率係19.5%，開始時買入一千鎊嘅基金，到波頓退任時賣出，可得回十四萬六千七百鎊，回報率實在驚人。
點知波頓先生最近去中國行咗一個圈，認為地心吸引力已經東移，西方開始「冇氣」（runoutofsteam），以後投資中國係一代人只會見一次嘅機會，機不可失，所以決定復出，籌集一個新基金，投資中國A股及香港H股，並且明年初就學紀勤，從倫敦遷居香港。咁重磅嘅人物東移，必定引起注意，不少跟風者會跟埋嚟香港玩，一位財務策劃顧問立即在倫敦發電郵：「波頓復出就好似阿里重上擂台咁轟動，對中國成為經濟超級強國之信心，投下一票。」
外電及《金融時報》對波頓咁誇獎，引到左丁山心郁郁，他日佢隻基金如係零售性質，想話買入少少，希望可以搵到食。記得不久前本欄引述基金F講，不少外國基金證券行明年來港，着眼於中國投資，將帶動本港甲級寫字樓及豪宅租金上升，但估唔到嘅就係，率先宣佈搬嚟香港嘅，竟係大人物波頓，佢一到臨，其他人可能要行埋一邊先，睇吓佢如何表演。
投資中國要睇長線。賓架L請吃蛇羮時講到，上海雖然信心十足，對前景高度樂觀，但照佢隨團北訪所見所聞，內地財金高官無特別扶持上海、貶低香港之意，香港仍然有自由開放及寬鬆環境吸引外資以香港為中國/亞洲基地，維持金融中心地位。佢話目前有五千幾六千億游資在港，戀棧不走，短期內亦見唔到有乜其他國家可以吸收呢大筆熱錢。發生杜拜風波，相信外資更會以香港為避風塘，令本地銀行繼續水浸。