熊黛林（Lynn）同陳豪噚日到銅鑼灣為LinksofLondon新店擔任開幕嘉賓，近日箍城有功嘅Lynn日前至同愛郎郭富城密會打邊爐近3小時，噚日Lynn一臉春風到場，即時搶盡到場陳豪嘅風頭，Lynn更做足準備回答記者嘅提問，當問到佢同城城打邊爐時，佢就不斷冧笑話：「總之食飯真係好簡單，正常朋友嘅交往，冇乜特別意思。」有指佢同城城戀情浮面，Lynn就話冇沉過又點浮，又唔肯正面回應到底係城城追佢，定係佢追城城。
唔知Angelababy劈腿
有記者打趣話以後可以稱佢為「城嫂」或「郭熊黛林」時，Lynn即撒嬌話：「唔要，唔要，唔好咁講，叫番阿Lynn好啲，唔係佢（指城城）唔鍾意，自己出嚟做嘢用番自己名好啲，佢冇異議，始終佢有自己嘅名，唔需要加咁多嘢。」
對於同公司嘅Angelababy同黃曉明撻着，Lynn就話唔知道，由於Lynn同黃曉明最近合作過拍攝電影《葉問2》，但佢就話冇見過兩個人一齊食飯，Baby亦都冇同佢提及感情事。