一日之計在於晨，據講食個豐富有營早餐，有助人體健康及日常運作，你我最常吃的未必是媽咪親手烹調的愛心早餐，最多反而是快餐店；快餐早餐時時食，邊間選擇多、夠份量、熱辣辣，最得人歡心呢？以全城至hit最多分店的三間來個大比拼！
記者：梁美甜
攝影：楊錦文、譚盈傑
Model:[email protected]
麥當勞
扭扭粉熱香餅最讚
N年前已被早晨全餐或熱香餅所俘虜，熱辣辣的班戟加上牛油及糖漿，香甜味美，嗜包者老麥選擇算最多。除經典早晨全餐熱香餅之外，每日更有十多款早餐套餐選擇，近日更推出多款醒晨早餐，由$12起，份量較套餐少個薯餅，價錢則平$5有多，通常都是一個包加杯餐飲，現時更可以免費升級換McCafe即磨咖啡。自問是咖啡奶茶族，每日總得飲杯啡茶，不過老麥是三間比拼快餐之中，早餐價錢最平一間，但咖啡奶茶就較遜色，即使免費升級的McCafe即磨咖啡，質素亦欠穩定。
近日推出的芝士扭扭粉系列及板燒漢堡系列，套餐由$20.8起，扭扭粉放一片半的車打芝士於通粉之上，配火腿扒或豬柳蛋、薯餅及餐飲，熱湯令濃郁芝士溶化，出奇地配，份量連大男人都叫飽。
火腿扒蛋芝士扭扭粉套餐$22.8
新推出的芝士濃湯，通粉面加入一片多一半的即食車打芝士，讓湯的高溫令芝士溶於面，看似簡單又不失好味。
（五★最高）
價錢 ★★囗
份量 ★★★
熱度 ★★★
好味道 ★★★
板燒雞腿漢堡套餐$22.8
套餐有個雞扒蛋包、薯餅及即磨咖啡，漢堡是熱辣辣冒煙，可見是即製的。
食客話
陳太 陳小朋友
多數會喺屋企食，有時會來這裏，囡囡同我都鍾意食熱香餅，又熱又香，自己整唔到。
潘氏夫婦
間中會去茶餐廳食早餐，呢度我鍾意熱香餅，夠熱好味；老公就鍾意食包類早餐，夠飽肚。
林小朋友
最鍾意食扭扭粉，好得意好好味！
大快活
蛋黃香蛋邊脆
快餐好少嚐到太陽蛋如此滋味，新近推出的阿活即煎加大碼雙蛋早餐的雙蛋，體積的確較其他快餐店大，即煎夠熱，蛋邊煎得微燶脆卜卜夠香口，蛋香呈半透明狀，吃到層次分明，幼滑具蛋香。粉麪份量亦是三者之冠，惟餐廳選擇較同類的大家樂少，但選擇卻更靈活，基本上顧客可以自行於餐牌上自由配搭，西式早餐一般配有湯粉麪或麥皮，早餐套餐一般由$18至$21，奶茶及咖啡味道夠地道，滑溜有茶香及咖啡夠濃郁。
阿活即煎雙蛋連燒汁雞扒配香菇肉碎上海幼麪$24
粉麪選擇一般有三款，但可揀選特別的上海幼麪。
新近推出的阿活即煎雙蛋，Size較一般餐廳大，煎得邊香蛋軟滑，上桌更冒着煙熱辣辣。
一般快餐店少有上海幼麪以供選擇，早餐粉麪份量更是三者之冠。
價錢 ★★★
份量 ★★★★
熱度 ★★★★
好味道 ★★★囗
食客話
李生
鍾意去茶餐廳食中式嘢如叉燒麪，間中來呢度，份量多夠飽而且夠熱。
劉小姐
早餐多數在家吃，間中來，價錢算抵，多士更是即烘夠鬆脆。
趙女士
呢度雙蛋煎得夠香夠鬆軟，奶茶夠滑，份量又夠，即煎即煮熱辣辣。
大家樂
牛乳炒蛋軟滑
三間快餐店，大家樂選擇最多，套餐起碼三十款，有湯粉麪、扒類、中式粥品等。新推出的北海道牛乳炒滑蛋早餐，蛋香軟滑還帶有少少蛋汁，吸引！另一道鮮油餐包，取材於地道茶餐廳的鮮油多，不過片鮮油稍嫌太薄太細，放於熱包之內，未埋位坐定牛油都溶得差不多，變成牛油餐包，失卻冷熱對比的強烈口感。大部份西式早餐都配一個湯粉麪，又或加$3都可以選配，早餐套餐一般由$17.5至$21.5，湯粉麪選擇亦多，一般都有兩款通粉、兩款米粉及一款麥皮供選擇；對絕大部份人而言，份量充足夠飽；餐飲的茶啡香滑濃郁亦相當有水準。
鮮油餐包早餐配炒滑蛋$19.5
鮮油太薄，要趕及牛油溶之前吃掉，否則成了牛油餐包，失卻鮮油冷硬、麪包軟熱的口感，套餐配熱湯粉麪，份量足又熱辣辣，夠飽足。
炒蛋夠軟滑，熱得來更滲漏蛋汁，好味！
餐包還算香軟，但鮮油略嫌太薄，很快就溶掉了，變成牛油餐包。
價錢 ★★★囗
份量 ★★★囗
熱度 ★★★囗
好味道 ★★★
北海道牛乳炒滑蛋配紐西蘭南冰魚柳$21.5
蛋汁加入北海道牛奶及細香葱炒成，蛋味濃郁具蛋香，軟滑滲出黃澄澄蛋汁，出色！魚柳炸得外層香口，內裏軟腍。
南冰魚製成的魚柳，外表炸得香脆。
價錢 ★★★
份量 ★★★
熱度 ★★★
好味道 ★★★囗
食客話
劉小姐
最鍾意呢度奶茶，通常是魚柳配通粉，份量充足好味！
梁生
近公司，夠方便，份量足又夠熱，最常食扒類加粉麪早餐，夠飽嘛。
陳生陳太
通常食有蛋及粉麪套餐，選擇多、夠熱，份量唔少好飽。
