廉政專員湯顯明近日可謂是非纏身，先俾截取通訊及監察事務專員胡國興點名炮轟，話阿湯畀錯資料胡官，浪費胡官寶貴時間。估唔到湯專員連假日揸車都惹是非。
有市民向八方報料，話啱啱過咗嘅周日下午，喺清水灣碧翠路Shell油站見到湯專員，湯專員嘅銀色歐洲座駕喺油站洗車兼換偈油，仲幫襯約500蚊包4公升偈油嘅套餐。
未經同意額外入油
本來換完偈油嘅車會特別爽，但過咗冇耐阿湯返油站攞車兼畀錢時就好唔爽。原來油站職員話佢架車容量大，要7公升偈油，費用要800幾蚊，但阿湯就話套餐已包晒所有偈油，又話職員冇事先通知佢，就同佢架車入滿7公升偈油。職員反駁話阿湯冇留低電話，無法通知，但阿湯堅拒找呢條800蚊嘅數，只肯畀套餐價錢嘅500蚊，跟住就開車離場。
報料人話冇幾耐阿湯又折返，同職員講願意畀多150蚊，但油站職員擔心會引起投訴，唔肯收錢，寧願私下填番三嚿水畀公司算數。報料人睇唔過眼，批評湯專員好離譜，「佢應該知道自己架車要7公升偈油，冇理由會唔知道，佢好過份。」
八方噚日到過油站，油站職員證實湯專員的確幫襯過，至於過程係點就唔方便講咁話。湯專員噚日承認有爭拗，佢解釋係堅持做精明消費者，覺得被屈，唔肯畀多300蚊。佢話當日被油站職員游說，同意用485蚊套餐價換偈油兼洗車。點知轉頭攞車時，職員話佢架車容量大，要入多咗3公升偈油，但亦要額外收多297蚊。
阿湯不忿，指職員未經佢同意咁做，懷疑油站銷售手法有問題，油站職員之後亦話唔收嗰297蚊。阿湯又話，雖然佢唔同意，但油站始終提供咗額外服務，佢仍願意畀多150蚊。佢又話，唔知架車要幾多偈油，亦唔知油站職員要啃嗰筆錢。
Shell就回應話，會了解同跟進事件，又話要求員工謹守誠實、正直同公平原則嚟經營業務。八方亦有揸車，知道偈油入唔夠嘅話，會傷到架車副偈，睇嚟油站職員應該係關心架車啫，但就冇問明車主，令專員覺得被屈。今次只係小事一樁，但湯顯明近排是非纏身，唔通係時候執吓辦公室個風水陣？
mailto:[email protected]