大閘蟹橫行多兩星期左右就會收爐，出年再同「有食力」嘅人相聚。早前大閘蟹最囂張嘅時候，唔少官場中人都同佢哋搏鬥過，落力將佢哋徹底消滅。曾經同高官一齊向大閘蟹宣戰嘅林健鋒話，女高官中戰鬥力最強嘅可能係公務員事務局局長俞宗怡，因為D姐係浙江人，堪稱官場蟹后。
男高官當中，林健鋒就話環境局局長邱騰華嘅食力都不容小覷，但一次過可以啃幾多隻蟹就係秘密。唐英年係上海人，理應對大閘蟹好有親切感，但林健鋒印象中嘅唐唐唔算特別好大閘蟹，唔知係咪嫌拆蟹腳太麻煩呢，都係鍾意軟腍腍嘅河蟹多啲？而林健鋒個人最高紀錄就係一次過戰勝12隻大閘蟹，可惜都係年少時嘅戰績，俱往矣！