無綫《萬千星輝頒獎典禮2009》明晚舉行，15個大獎花落誰家揭盅在即。雖則無綫已刻意押後頒獎禮，令台慶劇《宮心計》及《富貴門》雙雙入圍爭獎，不過《巾幗梟雄》的四奶奶鄧萃雯和柴九黎耀祥依然熱到開巷且越戰越勇，憑資深演技及高企民望由頭帶到尾，致向來獨攬「親生仔女」的無綫也要向民意低頭。巾幗雙驕根本冇得輸，雯女祥仔一於叠埋心水明日聽封帝后。
全城狂煲多時的《萬千星輝頒獎典禮2009》進入倒數階段，雖然今年競爭激烈，尤其無綫故意將頒獎禮押後至明晚舉行，安排兩齣台慶重頭劇《宮心計》及《富貴門》提名逐獎，令戰況更趨白熱化，但據悉最矚目的視帝視后大獎，最終仍是《巾幗梟雄》鄧萃雯和黎耀祥的囊中物。
谷楊怡爭獎失敗
無綫台慶頒獎禮一直被指為小圈子遊戲，過往多屆也屢由旗下「親生仔女」（即包薪藝員）如黎姿、佘詩曼、鄭嘉穎、陳豪和林保怡等封帝后。今次無綫特意為兩部台慶劇鋪橋搭路，可惜《富貴門》煲唔起，收視麻麻；《宮心計》則成功掀起全港煲劇熱潮，大結局的50點最高收視更令無綫叫絕。該劇播放之初，無綫曾狂煲麗妃娘娘楊怡，以其轉型做大奸角作賣點，奈何楊怡在演繹上用錯力，被網友批評似發癲多過扮奸妃。
反觀霸氣四奶奶鄧萃雯演齡深又民望高，加上與拍檔柴九祥仔同聲同氣，《巾》劇戰鬥力火速升級，且男角勁敵僅得《學警狙擊》的Laughing哥謝天華，如無意外他攞硬最佳男配角，令柴九奪獎機會又高一線。
祥仔：冇乜男對手
儘管今屆頒獎禮委員會仍由無綫5位巨頭包括總經理（電視廣播業務）陳志雲、製作部（戲劇製作）總監曾勵珍和梁家樹、製作資源部總監樂易玲和製作部（非戲劇製作）總監何麗全主宰生殺大權，但雯女和祥仔演技精湛，深得民心更是他倆必殺技，所以無綫也不能漠視民情，要將頒獎禮搞得公正嚴明。
在種種因由下，雯女和祥仔可謂冇得輸，兩人封帝后也確是實至名歸。至於其他大獎則由《巾幗》、《學警》及《宮心計》瓜分，祥仔和天華會在我最喜愛的電視男角色爭一長短；阿佘則是我最喜愛的電視女角色頂頭大熱（詳見列表）。
記者昨致電祥仔，問他會否認同自己冇得輸？他笑說：「今年都係嘅，冇乜男對手，《宮心計》又係女仔戲。」之前祥仔講攞獎心如明鏡，臨近頒獎禮卻突然緊張，他說：「越嚟越多人講，個個都係咁叫我（視帝），都有啲緊張o架。我信心有8、9成，始終呢個世界唔怕一萬、最怕萬一，仲有其他因素。」明晚其妻兒更會到電視城為祥仔加油。鄧萃雯昨關電話，至截稿前仍未取得聯絡。
此外，楊卓娜前晚出席活動，對於妹妹楊怡有望憑《宮心計》問鼎視后寶座，她說：「我同阿媽都覺得鄧萃雯做得好，我哋追《巾幗梟雄》追得好緊o架，反而《宮心計》唔係集集追。」
採訪：葉雪
《萬千星輝頒獎典禮2009》主要獎項預測名單
最佳男主角：《巾幗梟雄》黎耀祥
最佳女主角：《巾幗梟雄》鄧萃雯
我最喜愛的電視男角色：《學警狙擊》謝天華/《巾幗梟雄》黎耀祥
我最喜愛的電視女角色：《宮心計》佘詩曼
最佳男配角：《學警狙擊》謝天華
最佳女配角：《巾幗梟雄》謝雪心
飛躍進步男藝員：敖嘉年
飛躍進步女藝員：陳茵媺
最佳劇集：《宮心計》/《巾幗梟雄》
歷屆頒獎禮大事表
《1997年》
首屆頒獎禮在《萬千星輝賀台慶》中揭曉賽果。
《2004年》
鄧萃雯未能憑《金枝慾孽》如妃一角奪得視后，獎項落在簽無綫經理人約的黎姿手上。
《2005年》
周麗淇獲頒飛躍進步女藝員時，榨出眼淚。
《2006年》
萬千星輝頒獎禮分拆成獨立節目，佘詩曼憑《鳳凰四重奏》獨攬最佳女主角及我最喜愛的電視女角色兩大獎項。
《2007年》
掀起全城熱話的《溏心風暴》狂掃6獎，頒獎禮猶如變成《溏心風暴》之夜。
《2008年》
米雪憑《溏心風暴之家好月圓》飾演紅姨獲封視后，上台領獎時含淚多謝男友尹志強，全場感動。
《2009年》
以往在台慶月舉行的頒獎禮，今年押後到12月舉行，有指是為楊怡造勢。
資料來源：《蘋果》資料室
解碼：順從民意免捱批
論演技、論民意、論聲勢，黎耀祥及鄧萃雯在《巾幗梟雄》的表現明顯高出其他對手幾班，封帝后是必然的事。不過坊間流傳頒獎禮向來是陳總、樂小姐及珍姐的小圈子選舉，令賽果存在不少變數，尤其無綫經常被指玩驚喜來製造話題，又或是借獎項換取藝員續約。然而，今年賽果應是最公正的一年，全因無綫要借這個頒獎禮挽回形象。
坐享慣性收視的無綫，近日飽受抨擊，除被謔稱「CCTVB」外，更被指「事事旦旦」。網民插無綫由年頭插到年尾，總經理陳志雲更是首當其衝（圖）頻頻成為圍攻對象。也因為此，無綫更加不能置民意於不顧，就算十萬個不願，也要讓實至名歸的祥仔和雯女獲獎。
撰文：李全
