富林鄧普頓旗下一隻基金，最近買入資本策略（497）發行嘅1000萬美元可換股債券，噚日舉行簽約儀式，咁啱新興市場之父、富林鄧普頓執行主席麥樸思博士（圖）近日喺香港，亦畀面出席。
麥博士點解睇中資策？佢解釋，內地好多建築物都起得好靚，奈何保養做得好差，結果損耗得好快；而資策獨特之處，就係善於將建築物重新包裝翻新，令到建築物應有嘅價值重現，所以佢哋對國內房地產市場實在貢獻良多。
佢希望呢項投資，能夠為旗下基金未來5年帶嚟平均回報率，係每股盈利增長10至20%，但當然唔預期每年都有平穩增幅。佢仲話，唔排除日後價錢啱嘅話進一步增持，睇嚟資策主席鍾楚義真係笑得出嘞。