臨近年尾，賺夠嘅基金早已金盆洗手，坐埋一邊睇好戲，懶理高盛發功話大市仲有三成上升空間至28000，H指更睇升四成至要見21000嘅最終散貨目標。不過睇番短線大市似乎要先唞唞氣，因為三扒兩撥指數已回補杜拜事件下跌裂口，可惜升市成交冇明顯增加，輔助技術指標顯示動力缺乏，呢個星期似係悶局居多。
指數成份股唔行，對即日鮮大炒友來說，跟國策炒會發現更多寶藏。隨着中央經濟工作會議下周開幕，市場訊息開始百家爭鳴，亦有點混亂起來。最亂首選係內銀股，早一個星期先唱淡要提升銀行資本金要求，傳到似層層，仲要間間都達唔到標，都要集資幾百甚至成千億元（人民幣．下同）咁。昨日突然又有「消息人士」話，四大行可以將每年畀滙金嘅現金股息，留番喺袋當資本，即係話銀行唔再需要向市場伸手攞錢，彷彿一夜之間困擾銀行業嘅不明朗因素一掃而空，但股價表現就不見得越升越有，反而早市買咗下午要吃點眼前虧。
消息指內地放寬樓按
要接力大市升勢，昨日陸續湧現第二梯隊，內房股爆大冷，由頭升到尾。內地消息話銀行突然開綠燈，準備放寬樓按，明年新增貸款有成7萬億元，當中會轉移至中小企及樓市。聽落同中央政策背道而馳，冇理由中央會任由泡沫滋長，不過諗深一層，又唔係全無道理。因為上年宣佈4萬億元基建大計後，修橋補路完成得七七八八，上海世博又差不多搞完，得番蚊型迪士尼同四橫四縱鐵路建設，似乎難單靠基建谷GDP。
剩低冇乜新板斧，放手畀房產升值，有保有壓，似乎更勝翻叮內需概念家電汽車下鄉。有報道話溫州炒樓團喺杜拜炒燶樓，估計蝕咗20億元。媒體話佢哋貪畀一成首期就可以入市，起碼有五六千人活躍於市場入面，仲話有溫州炒家索性沽埋上海嘅物業，話擔心樓市爆破喎。觀乎溫州人炒樓往績唔似咁差，佢哋實力雄厚，即使夾埋蝕20億元，除開6000人每人都只係輸30幾萬，所以唔好信晒報道寫得咁嚴重。投資者要明察秋毫，辨清市場雜音，睇清真正走勢。
胡孟青