恒隆地產（101）主席Ronnie陳啟宗噚日向一班外商演講，佢將香港呢粒「東方之珠」，拎嚟同有座「東方明珠電視塔」嘅上海比較，仲借題發揮㖭。佢喺結論度勉勵港人，要加強自信心，因為即使一個IQ低但自信心強嘅人，都可以勝過IQ高但自信心弱嘅人。
Ronnie話，上海喺好多方面都已經超越香港，包括上海交易所上市公司市值（香港未有將國家控有嘅股份包括在內）、成交金額、上海兩個國際機場嘅客流量同埋港口貨物吞吐量，都大過香港，仲有就係上海市政府嘅效率，原來都相當高。
據佢分析，香港人要求走向民選制度，加埋立法會部份議員成日搞小政治，最終只會拖慢香港嘅發展步伐，而民主制度下產生一批短視政客，佢哋提出政策如果錯咗，又唔需要負責任，呢個唔只係香港，而係全球民主國家共同面對嘅問題。
佢仲話香港背靠祖國，內地經濟每年平均增長率達9至10%，香港理應亦有6至7%增幅，無奈家只可以做到約4%增長云云。華華就覺得佢係借經濟講政治，仲將香港經濟增長唔夠快呢個責任，推落市民要求民主呢個議題上。咁香港係咪投資唔過呢？
獅城乾淨似醫院
如果講投資房地產，佢好老實咁講，除非係恒隆嘅樓，否則佢會推薦上海樓喎，原因係最貴嘅上海樓都係每方呎1萬蚊，香港成4萬蚊。踩咗香港咁多腳，臨尾佢都捧番一句，話香港都唔係輸晒，因為呢度生活好有taste（品味），預期兩地都有條件晉身為國際城市。咁新加坡又點睇？Ronnie話：「新加坡好乾淨，乾淨到好似醫院咁！」
李華華
mailto:[email protected]