港股前日大幅反彈近700點之後，噚日再下一城，花旗股市企穩係重要原因，加埋A股同日股都造好，恒指攻破22000關收市，同條10日線距離唔夠200點，好淡雙方好快就到決戰時刻。
杜拜單嘢仲未搞掂，不過投資者嘅恐慌情緒已經平復，因為事件對市場嘅影響唔會好大。
中煤C輪17280：中煤（1898）昨收13.56元，升3.19%。股價連升兩日，重上10日線之上，短線有機上試14.30元，破位睇15.60元，可以翻兜隻C輪17280。
隻輪現價23.8仙，2010年3月30日到期，行使價12元，溢價5.9%，引伸波幅49%，槓桿率5.8倍（有效4倍），正股升上15.60元，17280睇40仙，如果正股跌穿12.80元，就沽咗隻輪止蝕。
俊樺