「跳水皇后」郭晶晶下個禮拜就會隨隊嚟港出戰今屆東亞運動會，入住尖沙嘴龍堡國際賓館。郭晶晶作為國寶級人馬，政府當然不敢怠慢，喺酒店附近加強保安。由於長實（001）嘅將軍澳樓盤領峯，售樓處就喺正隔籬港景峯商場，呢排樓市靜，經紀搏晒命搶客，政府都擔心經紀會對運動員造成滋擾，一個唔覺意，撞親啲運動員就好麻煩，所以一早已經做定嘢。
有經紀同華華講，警方早兩日已同個別代理高層打招呼，叫佢哋提醒啲經紀，呢排喺街拉客要小心，否則冇面畀。有代理高層話，呢幾日明顯多咗警察喺龍堡賓館附近巡邏，經紀拉客都唔敢太博，生意都受影響咁話。睇嚟領峯想好賣都幾難嘞。