公民黨黨魁余若薇今日喺立法會提出力促政府回應聯合國2009年氣候變化大會嘅動議辯論，樂施會同投訴合唱團將拉大隊去到立法會外，用音樂同行動聲援，希望政府及早制訂氣候政策，遏止氣候變化造成嘅環境同貧窮問題。
今次活動最特別之處，係投訴合唱團已經搵嚟余大狀、陳克勤同何秀蘭同佢哋一齊獻唱。據聞合唱團早前已經交咗歌詞畀三位議員，希望佢哋積極練歌，用最佳狀態獻唱，以防佢哋變咗政界Stephy或者Theresa。有興趣聽議員開金口嘅市民可以喺今日晏晝12點45分去到立法會同皇后像廣場之間空地；話唔定見到咁多粉絲支持，議員會encore都未定。