本年度世界聖誕老人回歸了。剛在瑞典贏得2009年度聖誕老人運動會大賽嘅陳漢強（阿Jim），噚日飛返香港。可能連日來嘅緊張比賽加上舟車勞頓，本來應該帶畀人歡樂嘅聖誕老人，踏出機場時唔多識笑，唔知仲以為佢輸咗比賽㖭。
相信係受到公關掣肘，呢位港產聖誕老人噚日喺機場唔多願意回答記者問題，只係好行貨咁講咗幾句。佢話自己身形細粒，比較輸蝕，結果都能奪冠好開心。呢個比賽有五個環節，三日內完成，但阿Jim乜嘢項目取勝，連自己都唔清楚。
今日公開講比賽經歷
聖誕老人運動會喺零下20度嘅冰天雪地舉行，瑞典當地傳媒報道，現場有幾百觀眾圍觀。可惜東亞運冇爬煙囱、賽雪橇項目，否則阿Jim一定可以為港摘金。
想一睹出爐世界聖誕老人風采，今朝11點可以去將軍澳中心，屆時阿Jim會分享佢嘅比賽經歷。阿Jim早喺07年已經喺香港取得代表資格，但遇上08年金融海嘯，決賽取消，今年復辦，阿Jim算係攞番個遲來嘅冠軍。