泛民主派「五區公投」去向未明，唔少人覺得佢哋煲梗冇米粥。工聯會會長鄭耀棠就形容計劃猶如「滾水淥豬腸」，暗寸規模越縮越細，點算係總辭？既然未成事，棠哥就拒評工聯會係咪會派員參與總辭後嘅補選，換言之被睇好喺九東硬撼傑哥嘅陳婉嫻都仲可以繼續享受退休生活。
不過，作為工聯會重量級人馬，嫻姐又點會冇重任喺身？棠哥話佢哋個政務委員會正喺五個地方選區搵緊竇口，畀一班有可能出選2011年區議會選舉嘅年輕一代有個上堂地點，教授佢哋選舉知識，而身經百戰嘅嫻姐如無意外會擔任「校長」，向後生仔講吓選舉文化兼傳授選戰心得，為工聯新世代添加「食力」。