預產日未生得，心癢癢走去食幾個熱辣辣叉燒包，甚麼叉包如此吸引？就是上周出版2010港澳版米芝蓮指南，入選一星的地踎點心店添好運，殿堂級米芝蓮$4吃到，今年最驚喜就是更多地道平民食肆入選！
記者：梁美甜
攝影：楊錦文、梁細權
Model：Kinki@ZModel
酥皮焗叉燒包$12
叉燒包細細件，賣相普通，一咬驚喜，入口甜而不膩，最重要是不嗆喉，熱辣辣，滿足！
添好運媲美四季點心
今年3月至開張，座位有限空間又窄，出品卻媲美四季酒店三星食肆龍景軒，點解？全因師傅麥桂培就是出身四季點心部，點心製作有要求，又堅持即叫即蒸，點心$10起，真正價廉物美。米芝蓮星級推介招牌酥皮焗叉燒包、潮州粉果及馬拉糕。叉燒包一客三個$12，一個才$4，外皮酥化香脆，內裏不是一味死甜，口感豐富又多汁，單是叉燒包已經日賣千個，小店由早上開舖即擠到晚上落閘。
「發夢都諗唔到！」培哥得知入選米芝蓮一星時直言。咁受歡迎，會擴張嗎？「唔會，都無時間做，家都有好多地方要改善，好似後勤、運作等。」培哥話會維持高質素，用心機做出獨特招牌點心最重要。
採訪當日是米芝蓮公佈翌日，早上11時多店前已大排長龍，不少食客更等到面黑黑，模特兒Kinki拍攝前仲話：「幾好味都唔會等咁耐喇！」言猶在耳，食過叉燒包之後：「超好味，打包兩碟呀唔該！」最誇張是準媽咪林小姐，當日是預產期，見BB仲未肯出嚟，做完檢查即刻走來吃叉燒包！難怪，十幾蚊嚐到米芝蓮星級美食，全城獨此一家！
香滑馬拉糕$10
簡單一道點心，糕身鬆軟有彈性，帶有濃濃的蛋香。
臘味蘿蔔糕$10
見蘿蔔絲，味道濃郁，煎得外皮香脆，內裏軟滑。
如果我畀星
林小姐枱面放了排骨飯、叉燒包、腸粉、馬拉糕、潮州粉果、鹹水角……一個人食咁多？原來唔只一個人，準媽咪林小姐：「今日是預產期，BB未肯出嚟，做完檢查就順道來吃。叉燒包又脆又多汁，不太甜太漏，馬拉糕香軟好食！我畀三粒星！」
徐家，徐生（左二）：「等了個半鐘，四個人吃了13個點心連茶，都不過$168。叉燒包多汁味濃又香；蘿蔔糕都好好味。」
黃小姐：「見傳媒介紹就趁放假來試，等了兩個幾鐘！叉燒包又真係幾好味，蘿蔔糕同腸粉都好好味！」
添好運（23322896）
旺角廣華街2-20號翠園大樓8號地下舖
杭州酒家頂級龍井蝦仁
食客都說杭州酒家的菜比杭州做得更正宗，老闆兼掌廚吳瑞康師傅知道入選米芝蓮時呆了！定過神來，食客夥計都買來蛋糕一同慶祝。吳師傅父親曾掌廚於天香樓，兩代都是名廚，杭州酒家價錢大眾化又堅持用料來貨源自杭州，一道龍井蝦仁，用的是頂級龍井茶，河蝦全是每日新鮮由杭州運抵，人手剝殼，再以生粉、清水洗淨，加入蛋白調味醃過，拉油後加入龍井茶製成；河蝦鮮甜味爽，加少許鎮江醋更有提鮮作用，簡單鮮嫩而不油膩。東坡肉同是推介，看似肥膩的豬腩肉，咬落卻皮脆肉嫩，配以自家製夾餅同吃，餅身吸盡肉汁，加上熱辣辣麪粉香，比肉香更吸引。
龍井蝦仁$198
一客六両鮮活河蝦絕無欺場，以頂級龍井茶入饌，蝦鮮甜爽口，滲出淡淡茶香，餘韻悠長。
東坡肉配夾餅$78（例）
每日用上20斤五花腩，以生抽、老抽等紅燒，再加入陳年紹興酒。肉味香濃而多汁。每日供應約30客。
杭州酒家（25911898）
灣仔莊士敦道178-186號華懋莊士敦廣場1樓
阿鴻小吃滷出星味
與添好運堪稱今年最平星級食肆的阿鴻小吃，以新派滷味打入星級行列，連蔡瀾都大讚。星級推介有滷水豆腐燒腩肉、香脆墨魚餅，最叫人回味是小店創意招牌雞腳筋，有麻香及芥末兩種味道，大受年輕人歡迎。
麻香雞腳筋$40
以白滷水冷浸而成，咬一口，雞腳軟腍，滲出醋及酒香，麻醬味充斥口腔。
阿鴻小吃（25701108）
北角和富道84-94號銀輝大廈地下4號舖
車胎人推介
容記小菜王舊區五層樓燒肉
除了星級，更有300元食三道菜的「必比登車胎人美食」推介，最讚是有不少位於平民舊區要捐窿捐罅才找得到，就像以一道脆皮燒肉贏盡明星食家歡心的容記小菜王，「事前完全唔知，知道之後仲開心過中六合彩……我家姐更加開心到流眼淚。」老闆兼大廚易偉容說。容哥對食材要求高，燒肉用的是新鮮豬腩肉，肥瘦相間皮又厚，以電爐燒製，最巴閉是皮厚燒後香脆鬆化，五層樓腩肉肥瘦分明，肉汁豐腴。奇怪是外賣要$138，堂食則$118，外賣比堂吃更貴？「人家親自來捧我場，當然要多謝人喇！」
雞蛋焗魚腸$48
功夫菜。鯇魚腸加蛋及蒜、陳皮調味焗製，乾身甘香蛋味濃。
招牌脆皮燒肉$118（堂食）
以五層肥瘦相間腩肉燒製，皮鬆肉嫩又多汁，日賣二百多斤，開舖一個鐘就賣十多份，極受歡迎。
容記小菜王（23871051）
深水埗福華街108號地下
蛇王二地道禦寒臘味
另一位於小巷窄街的平民食店都俾評審員搵到，入選必比登。蛇王二食的絕不是老外見慣吃慣的食材，而是港人冬天至愛的臘腸，招牌蛇羮之外，必試脆皮臘腸或膶腸，軟香油潤，配飯一流。
臘味飯$32-$38
膶腸的油滲入飯中更添油香，下飯一流。
蛇王二（28310163）
銅鑼灣波斯富街24號
