胡諾言、陳琪的愛情結晶品小Jay不經不覺已經接近3個月大，囡囡白白胖胖，笑容滿面甚可愛。胡仔和陳琪計劃一籮籮，除了為小Jay努力搵外快賺奶粉錢，還購置全新攝影器材，又打算換一架七人新車，給小Jay一個五星級的生活。
胡諾言（Jack）和陳琪（June）的女兒9月3日出世，第一時間給女兒改了一個有型的英文名小Jay，並組成三J家庭。
想組大家庭
小Jay轉眼間已經三個月大，表情多多，又開始識得認聲認人，得兩公婆開心不已，胡仔昨日說：「家屋企比以前多咗好多笑聲，我個女又開始認得人，聽到我呀、媽咪、工人把聲就笑，仲表情多多，之前陳琪有BB嗰時，我就係叫佢成日笑，所以Jay好鍾意笑。」
胡仔和陳琪為了小Jay計劃多多，除要添置新的攝影器材，拍攝女兒最美麗的每一刻之外，還打算換一架七人車，令女兒有更寬敞的車廂空間，所以兩公婆聖誕密密接騷搵真銀，胡仔說：「其實之前都買咗好多靚相機，要影低囡囡最靚一刻，家三個月已經有成千張相，之後仲打算換架七人車，出出入入可以更方便。」三口子加一個工人，換一架七人車，胡仔是不是想再添新成員，他說：「我都想，不過應該唔會咁快，老婆仲有個纖體廣告，係都要等佢完咗先，其實我哋係個好重視家庭的人，都想一家人熱熱鬧鬧，可以同幾個小朋友一齊玩。」
精靈小model
除了胡仔和陳琪努力搵錢，不少廣告商都睇中可愛小Jay，最近他們一家三口為一間新的影樓做代言人，估不到小Jay竟然表現專業，對着鏡頭表情多多，胡仔說：「嗰日都由朝影到晚，大家都安排BB仔瞓覺時間，小Jay朝早最精神最可愛，所以佢一馬當先做第一個模特兒！」
撰文：楊潔雯
