豬流感第二波隨時殺到，政府噚日宣佈，呢個月優先為五個高危組別人士打豬流感疫苗。不過，好多人對打豬流感針心大心細，因為副作用可大可小，嚴重甚至會癱，都咪話唔驚。環顧特區政府主要官員，除咗周一嶽計劃身先士卒以身試針之外，剛滿65歲嘅煲呔同有心血管病嘅鬍鬚曾都有資格打針。
有針冇人打變相浪費
食衞局副局長梁卓偉噚日喺記者會話，今次冇特別安排為特區主要官員打針，佢哋同其他市民一樣，只要係屬於嗰五類高危人士就可以優先打。早前八方報道過，作為主管醫療衞生政策最高問責官員嘅食衞局局長周一嶽，以自己都係半個醫護人員嘅身份，計劃接受豬流感疫苗注射，以證明畀大家睇，唔使驚，打得過。
八方唔係醫生，但就睇過新聞話外國曾經有人打完針之後要坐輪椅甚至半身癱瘓，就算中招機率細過中六合彩，聽落都好驚。煲呔個幾月前生日，剛剛加入豬流感第三類高危組別「65歲或以上長者」嘅行列，有資格優先打豬流感針。咁佢又打唔打疫苗呢？八方問過特首辦，特首辦話煲呔準備去打，但未有時間。
八方小人之心，覺得呢個答案真係醒。既然政府家呼籲得高危人士去打針，作為特區之首嘅煲呔冇理由唔去打，否則咪即刻話畀大家知佢都驚有副作用，花二億幾買番嚟嘅疫苗隨時有針冇人打，浪費公帑。不過，如果打完之後有乜冬瓜豆腐點算？所以睇定啲都啱，至少等周一嶽打完先打都未遲。
至於鬍鬚曾，通過波仔嘅佢屬於第一類高危組別嘅「長期病患者」，理論上都有資格優先打豬流感針。佢嘅發言人只係話，司長有需要時會打。
mailto:[email protected]