雖然政圈河蟹當道，但每年到咗呢個時候，河蟹嘅風頭都被另一種蟹蓋過。進出口界代表黃定光年年都喺中華出入口商會會所舉辦大閘蟹宴，今年啲蟹宴已經舉辦得七七八八，唔少司、局長包括唐唐、林公公、劉吳惠蘭同陳家強等都去過拆蟹，就連河蟹局長曾德成都百無禁忌，將一隻隻同類放入肚。
原本黃定光諗過請鬍鬚曾食蟹，但對一個通過波仔嘅人嚟講，咁做豈非愛佢變成害佢？黃定光唔想累人，但又戥鬍鬚曾冇口福可憐，所以考慮為鬍鬚曾設魚宴，等佢擦餐勁。雖然煲呔都愛拆蟹，但黃定光話暫時唔會請佢，事關煲呔一出動就有N個G4護駕，到時要封晒成個會所都似；為免勞師動眾，索性唔請。