喺近乎冇希望嘅情況下，反高鐵示威者仲未死心，噚日起一連三日，開始以電話、踩場，同再次包圍立法會嘅方式，叫議員聽日要按民意投票。佢哋分工打電話嘅手法都好有創意，叫支持者根據自己身份證號碼最後一個數字分工合作，例如1字尾就打畀李永達、李華明、2就打畀涂謹申、鄭家富、3就打畀甘乃威、陳鑑林咁餘此類推。
找三政團求助
如果真係個個都咁做，八方相信好多議員辦事處今日都會受到電話轟炸。反高鐵行動今日會有踩場行動，一班菜園村村民今朝10點半會到民主黨總部，之後再踩上工聯會同民建聯，希望三個政團要求政府撤回669億天價撥款。
除此之外，提出過錦上路方案嘅公共專業聯盟，今日會搞個「高鐵廿三條」記者會，話有新建議畀政府。不過做咁多嘢，相信形勢都唔會有好轉變，始終保皇黨喺財委佔過半票數，泛民方面民主黨又好似話投棄權票，呢六百幾億，相信政府好快到手。