唐唐仲未宣佈角逐下屆特首，已經係頂頭大熱，除咗因為佢嘅商界背景贏到唔少商界支持之外，佢亦好積極咁經營同內地嘅地方關係，今年已經走勻廣東省九個市。噚日，深圳市代市長王榮畀面回訪，同唐唐喺會展開2009年深港合作會議，之後仲一齊開記者會宣佈七大合作協議，但大部份內容都係炒冷飯或者高大空，例如文化體育合作之類，冇乜實質嘢。
不過，唐唐仍然樂此不疲，聽日又去廣州，出席「第16屆亞運會組委會、廣州市人民政府與香港賽馬會關於亞運會馬術比賽場建設、賽事技術支撐和賽後利用相關合作事宜備忘錄」簽署儀式。淨係望見呢個水蛇春咁長嘅名都知唔係乜緊要嘢，唐唐親自出馬，可能係要想話畀大家聽，佢同廣深關係一樣咁好。