發燒音響　iPhone膽味濃

iPhone多人用，配件自然多選擇，而當中嘅喇叭更係出到五花八門，正經嘅有、奇形怪狀嘅更有唔少，不過講到音質就難以同發燒級音響比拼。其實要用iPhone聽出原聲都有計，最近就出現一部可連接iPhone嘅膽機，音質幾可媲美中高檔嘅音響器材！

記者：許福合
攝影：陳陶鈞
Model：Paris@PureModels

6倍擴音

點解要用iPhone聽歌？唔只因為佢型，其實iPhone用上一個極佳DAC解碼器，純粹講音質已可媲美高檔嘅CD轉盤，若再接上新出現嘅TrendsPA-10膽機，試聽時特別覺得低頻夠實，中頻清晰，高頻音場夠闊，即使玩慣音響嘅用家，亦會覺得入得耳！呢款膽機大約只有手掌大小，上面見到可插一個DJ/69228或12AU7系列嘅膽（真空管），機背雖然與一般擴音機一樣，都係一排插頭，其實最左邊一組係專為iPhone而設計，內置6倍擴音功能，只要再用附送嘅音響線連接iPhone底座嘅插頭，就可提高到發燒級兼膽味十足嘅音質。

■雖然只有手掌大小，不過仍有兩組輸入及1組輸出插頭。

■亦可直接插入耳機聽歌，還可調校音量。

換膽聽歌

對於發燒級玩家，可以更加講究，首先，音樂檔案格式最好以AIFF或AppleLossless為佳，始終要聽得更多，非壓縮嘅檔案自然保存得最好。其次係加個良好嘅擴音機，做成前後級效果，聽落音質會更幼細，甚至係歌手輕微震音或吸氣聲都聽得清楚，猶如在你面前表演一樣！若然仲未夠發燒，更可以考慮埋膽機嘅精髓換膽，按照歌曲嘅類型、種類，更換適合嘅膽去聽，例如想聽到更好嘅人聲，可以選擇美國GE12AU7膽，人聲細緻，如同在耳邊演繹一樣，咁先叫做品味音樂。