未到曼谷之前，秘書V提醒，有兩間餐廳要早啲預訂，否則去到曼谷先打電話，多數冇位。佢又幾醒噃，左丁山為咗呢個即興遊，諗都未諗過，於是由秘書V代辦，用長途電話及互聯網卜位。
星期五晚上去到曼谷，次早醒來，吃過酒店早餐就去咗素坤逸路（Sukhumvit）一帶，後來想去湄南河畔之香格里拉酒店「香宮」飲茶，點知一上的士就碰上塞車，塞呀塞呀，一個小時後先至抵達，香宮已經中午休業，要晚上再見了。曼谷塞車實在驚人，唔係人咁品，如要控制時間，坐高鐵好過。香格里拉外（約行五分鐘）有一條高鐵綫終站，上車可直返「國家運動場」，約莫十零分鐘啫。
既然香宮入不得，既來之，則安之，坐在河邊o架啡室吃其泰國泡飯，望吓河景，享受悠閒，一樂也。晚上由酒店去預先訂位嘅意大利菜餐廳Zanotti，唔知離開高鐵站有幾遠，唯有搭的士，一開車，司機就博懵，話唔清楚Zanotti喺邊度，逼住拿出地圖畀佢睇，佢兜其大圈，又搞咗九個字先至去到「是隆路SilomRoad」左轉入SoiSaladaeng，好快就搵到，唉吔，原來搭高鐵好過。
呢間位於路旁平民大屋之餐廳，果然客滿，外國人佔了六七成，一睇餐譜，嘩，乜咁便宜呀，烤大蝦王只賣三百九十，係泰銖呀，唔係港幣，伸算只係九十四蚊，嚇死。點菜要凱撒沙律、意大利菜湯、煎鵝肝、燒牛肉、意大利雲吞、烤蝦王，一支意大利白酒、再加甜品，三個人食到飽一飽，回味無窮，埋單加10%服務費，7%銷售稅，加埋係六千八百銖（港元一千六百三十），可以咁講，此餐廳平過香港Domani，更加平過Nicholini's、Grissini好多，但風味有過之而無不及，左太第一次來此，立即吩咐：「以後每次到曼谷都要到Zanotti。」唯有遵命啦。飯後截的士返公主酒店，呢位司機比較老實，而且晚上塞車冇咁嚴重，十分鐘就返到，畀埋貼士只不過六十銖，同在東京搭的士相比，真係有差天共地，無怪呢輪日圓升，美元跌，旅客改往曼谷，少去東京。