恐慌過後，股海來個大反彈，恒指昨抽升687點，收報21821，重返50日線之上。
大市雖升，但昨日成交卻縮至唔夠800億元，反映買盤動力唔多夠，不過呢種咁反覆嘅市況，唔係個個投資者都夠膽入市，就算敢入市者，多數都係炒短線或玩「即日鮮」，因為杜拜事件點樣發展仍未知，後市仲會好反覆。
好股唔怕低位買，問題係機會出現時，你又敢唔敢出手？好似澳優乳業（1717）上市至今差不多兩個月，頭一段股價表現真係威水，由4.14元一路炒上7.25元，申購者無不賺個眉開眼笑。
不過，踏入11月初，股價漸見回吐，上周五港股大瀉，澳優亦裂口急跌至最低5.83元收市，貼近全日低位5.80元。
星俠本來以為澳優短期仲要再跌，但大市陰霾稍為消散，該股昨日即以裂口向上爆升7.4%，收報6.26元。
澳優強勢猶在，只要市況相就，升浪隨時再來。澳優短線在6.50元會略有阻力，建議吼股價回吐至5.80元至6元時才吸納，中線目標7.70元。
方星俠