由李宗盛、周華健、羅大佑同張震嶽組成嘅SuperBand將於明年1月6日同7日喺紅館舉行兩場「縱貫線SuperBand世界巡迴演唱會2010終點站inHongKong」，佢哋噚日就喺紅磡舉行個唱記者會。
大會安排咗兩位作性感打扮嘅聖誕女郎頒發旗幟畀佢哋，當中一名聖誕女郎嘅上衣仲出現爆奶危機，搞到4人喺現場唔敢四圍望，當啲聖誕女郎頒「最乜乜」旗幟畀佢哋時，羅大佑同李宗盛都話想要個女仔多啲。
周華健「最大」
當周華健獲得「最大」旗幟時，張震嶽即抵死向下望一望周華健嘅下面，之後仲搞笑咁「嘩」一聲，周華健即得戚話：「多謝我父母。」佢哋透露今次個唱同上次會好唔同，至於問到佢哋會唔會騷胸肌着透視裝時，周華健就自爆一早已向經理人要求有女dancers伴舞，但到家都冇聲氣，李宗盛亦話：「吓？透視裝，激凸嗰啲？咁就要有梁朝偉眼神同郭富城嘅身材先得。」周華健更擔心會趕客收場。