影視及娛樂事務管理處噚日公佈今年10月收到84宗投訴，當中涉及14宗投訴嘅8宗個案輕微違規，其中11宗投訴同無綫有關，包括7宗係關於8月18日翡翠台午間新聞，話恒指中午收市報2,075點，查實係20,075點，唔知當時有冇股民嚇到鼻哥窿冇肉呢？
有TVB觀眾又發現，翡翠台報道陳水扁「世紀弊案」時，喺一幅顯示陳家秘密戶口所在地嘅地圖上，將毛里裘斯由原來喺印度洋西南面非洲海岸搬咗去南美洲東面。
無綫外事部副總監曾醒明認錯之餘，竟然話今時今日觀眾真係光怪陸離，試過有人睇完劇集投訴電視台影射佢，但觀眾永遠是對的，所以電視台仍然要回應感謝賜教咁話。唔知郭生有冇投訴《富貴門》呂良偉個角色影射佢呢又？