搵食艱難，一向叠水嘅杜拜都會出事，可想而知！世上邊仲有鐵飯碗，不過若然做到模範員工，我求大俠諗，都會「襟玩」多幾年；講緊嘅就係啱啱喺上周末替侯城入12碼扳平、爆大冷1:1逼和油佬控制嘅曼城，31歲嘅中場布拿特呀。
為老虎仔逼和曼城
喺上個禮拜三侯城喺英超以3:2擊敗愛華頓，連續3場搶到分之後，我求大俠就大讚過呢支中部球隊由病貓變番猛虎，不過，好明顯曼城班球員就冇捧我場啦。因為言猶在耳，曼城喺上周六場聯賽對住侯城時，領先一球就hea吓hea吓，咪盞俾機會呢隻猛虎繼續發威；結果真係俾布拿特射入12碼同侯城扳平。和波後，侯城以15戰得16分排第14位，連降班賠率都冷埋。
侯城轉勢，除咗領隊菲爾布朗有功勞外，今場入球功臣布拿特更加功不可沒，猶記得當菲爾布朗喺09年1月以破球會紀錄嘅500萬鎊從富咸羅致布拿特時，佢同侯城踢咗一場就傷咗膝頭，仲要全季打柴，就係咁，菲爾布朗被大家嘲笑買咗個病壞番嚟。千辛萬苦，布拿特等到今年10月終於可以復出，雖然仍未百分百有狀態，但佢憑住打不死嘅精神，前仆後繼，打出身價波，協助球隊頻頻搶到分。
入波慶祝扮老細搞笑
佢上陣賣力之餘，亦好鬼有幽默感，今場入波之後，佢就扮菲爾布朗喺上屆球隊俾曼城大炒5:1之後，喺球場度狂插球員嘅情境作為慶祝，難得嘅係隊友亦都交足戲，令場面十分惹笑。賽後菲爾布朗都話：「賽後我無法恭喜球員，因為我俾布拿特搞到笑到肚攣呀！」
至於布拿特賽後就好謙咁話搶到分係全隊嘅功勞，仲話如果唔係菲爾布朗調動得宜，球隊近況未必會回升得咁快，所以入咗波之後要向佢致敬。布拿特咁識做又識撈，如果我係菲爾布朗，就一定會頒個最佳員工獎畀佢喇！
