花費15億元公帑搞嘅東亞運開鑼在即，有幾多人關心唔使多講，兩隻吉祥物東仔同亞妹，知名度不提也罷，東亞運嘅紀念品，怕且送都要諗諗，真係唔講都唔知，原來九龍灣MegaBox商場入面，有間售賣東亞運紀念品專門店，有幾多人幫襯，都係唔好問啦。
民間團體「107動力」噚日上門到呢間專門店踩場，幾個成員手持烏蠅拍，諷刺呢間舖頭拍烏蠅，其實成個東亞運都係烏蠅先啱，據講佢哋早前曾派人實地視察，發現專門店真係冇生意，門庭冷落、小貓三兩隻已經係十分客氣嘅形容詞，「107動力」要求政府日後全面公開東亞運賬目，等納稅人見識吓官僚花錢本事幾咁精采。