香港人一人一票雙普選唔知仲要等多幾多年，反而小學生幸福得多，已經可以嘗試公投滋味──唔係投票揀領導人，只係一人一票選出心目中最具代表性嘅香港地道小食，體驗普選公投呢種「普世價值觀」。
不熱氣 家長不抗拒
呢個地道小食公投邀請全港近600間小學、約38萬名小學生參加，喺10款地道小食中票選最能夠代表香港嘅地道小食，結果喺收回嘅超過137,000票當中，陪伴無數港人成長嘅雞蛋仔獲31,413票成為冠軍。雞蛋仔應該係香港獨有街頭小食，其他地方都冇，據講喺50年代，有小販向雜貨店低價收購壓爛咗嘅雞蛋，撈埋麪粉、牛油攪成漿，倒入餅模烘到香香脆脆而成。
家陣雞蛋仔賣到成行成市，行街隨時隨地都可能聞到嗰陣牛油、蛋香味，一底一底嘅雞蛋仔趁熱食最正，唔好話細路，連大人都好難抗拒唔買番底過吓口癮。雞蛋仔之所以得一眾小學生歡心成為公投「小食王」，超群餅店負責做雞蛋仔嘅芳叔鄭華芳稱，固之然同香口有關，而且雞蛋仔主要成份只係雞蛋、牛油，似乎無炸薯條、雞翼之類小食咁冇益，家長冇咁抗拒買畀細路食。八方相信，僅賣十元八塊一底，呢個小學生都輕易負擔得起嘅平民化價錢，亦係雞蛋仔深得民心原因。
今次小學生公投小食活動，人稱絲襪奶茶嘅港式奶茶以21,434票排第二，由於奶茶係香港特色飲品，基本上無人不識，賽果好合理；不過得票13,732票嘅龜苓膏就真係爆大冷，小學生有乜理由鍾意食龜苓膏呢？呢個問題，可能要由呢次選舉贊助商之一嘅龜苓膏公司先識答。香港細路早熟，口味成人化，雲吞麪以13,702票排第四位，反而聞名中外嘅fishball魚蛋，只得11,047票排第五位。好彩呢次最受歡迎食物公投唔係以水果或家禽做主角，否則選出一隻蕉、一隻乳鴿都幾弊。
mailto:[email protected]