政改諮詢文件一出台就俾人鬧，官方有冇做民調了解市民接受程度呢？八方發覺原來有個政府部門進行嘅民調，應該真正反映民意。
進行民調嘅政府部門就係香港電台，自諮詢文件推出後，港台喺網站設立政改專題網頁，介紹諮詢文件內容同埋有關嘅報道、評論，同時提供網上投票，詢問市民是否滿意政改方案。截至昨日，網上投票結果顯示，有88%人不滿諮詢文件，僅一成人表示滿意，不過網站無顯示總投票人數，也容許重複投票。如此一面倒數據，高官睇見應該都幾皺眉，港台既然係政府部門，呢個網投都算係官方數據，日後總結諮詢結果時，唔好輸打贏要喎。