前星期偷得浮生半日閒，搵泰國Ｒ幫忙，臨急買到機票，走咗去曼谷作四十八小時急遊。成日以為亞洲經濟尚在復甦階段，又未到十二月中，去曼谷好易嘅啫，誰知大謬不然，周末去曼谷，機位難求，最後都係要泰國Ｒ出手打救。以後要及早預備，唔好搞一星期前就話要去嘅即興旅行矣。
有機票，去曼谷好快嘅啫，晚上八點半起飛，三小時後就在曼谷機場，返市區酒店嘅最好方法，就係租用AOT（泰國機場）的士，千餘銖租用一架小Van，風馳電掣，半小時就到達市內泰國Ｒ推介之Pathumwan區嘅PathumwanPrincess（公主酒店）。呢間係四星商業酒店，在MBK中心隔鄰，由酒店一樓大堂可直入MBK，一直行到最前面之東急百貨，由行人天橋過高鐵之國家運動場（NationalStadium）車站，上車一分鐘就到著名之SiamParagon、DiscoveryCentre、SiamCentre，在此過天橋就係「沙炎廣場」SiamSquare啦。以此觀之，住在公主酒店，如果鍾意買貨購物嘅話，十分方便。酒店內好多外國遊客，晨早九時吃早餐，o架啡室內坐滿人，食完行去MBK、東急、到Paragon，一路只見人潮洶湧，人逼人，商場生意繁忙。淨係咁睇，邊度有經濟衰退呀？邊個話泰國政治動盪呀？講嗰位實係儍嘅。當然，左丁山初出道之時，在荃灣工廠返工，日日在荃灣走動，只見生活逼人，壓力甚大；後來設法逃離荃灣，到中環返工，嘩，唔同晒，人人身光頸靚，酒店茶室氣派不凡，一片好景，與荃灣相比，係兩個不同世界。
一位泰國朋友講：「在沙炎中心一帶所見，係有偏差嘅，到upcountry（泰國人愛講曼谷以外地方為upcountry）睇吓，先至會有一個平衡印象。」所言甚是，但我哋呢類市區遊客，來此為了享受，不是做fieldtrip（實地視察），邊有時間與心機去鄉間體察民情吖，無怪共產黨搞革命，會發起「鄉村包圍城市」，煽動農民造反先，以帶動市區工人階級上街。此日報紙講總理阿披實要到清邁視察，清邁有人發出暗殺威脅，幾得人驚，清邁係他信老巢，紅軍多於黃軍，可以理解，但如果真係暗殺來自曼谷的總理，泰國內鬥難免。