傅穎（Theresa）、HotCha同江若琳等前晚到紅磡為雜誌舉辦嘅音樂會擔任表演嘉賓，所有嘉賓喺現場都有獻唱，惟獨經常被批評唱歌走音嘅Theresa就冇唱歌，不過佢就死撐話自己仲揀緊歌，而且佢籌備緊新碟，所以希望遲啲唱新歌畀大家新鮮感。
由於Theresa同舊公司金牌大風仲有合約糾紛，所以令人揣測佢怕唱舊公司嘅歌會牽涉法律問題，Theresa就解釋話：「暫時呢段時間會唱人哋歌，唔係合約問題，亦都唔係舊公司唔畀唱，因為要畀新鮮感大家，所以先唔唱以前嘅歌。」
走音賴歌曲難唱
至於係唔係因為又怕再走音，Theresa就繼續死撐話以前嘅歌好有難度，自己亦都唔想再有走音情況出現，佢話：「不過自己亦都唔想逃避呢件事，所以會練多啲歌，希望大家會對我改觀。」
此外，鄧麗欣（Stephy）噚日化身仙子到柴灣擔任聖誕啟動禮嘅嘉賓，提到死敵Theresa前晚出席活動時唔唱歌，Stephy就話唔清楚，不過佢知道對方嘅合約仲處理緊，反而佢自己嘅合約問題就已經落實。
Stephy話：「我同Kary（吳雨霏）一樣由死約轉生約，我亦決定咗繼續留低，因為同公司合作得開心。」