甚麼叫「耳濡目染」？903DJ細So示範了一個最好嘅例子，由一直覺得揸跑車老土，到最近花了約十萬元買部古董跑車MGBGT回來作假日消閒車，全因受一班朋友影響而愛上。揸了ToyotabB近六年嘅佢，更要重新學習揸老爺車，慢慢摸索如何跟呢位「老伯伯」溝通。
記者：許維雅
攝影：陳陶鈞
側鏡無用都唔拆
總覺得商台DJ在俞琤及林海峰兩位車癡帶領下，特別迷車講車經。俞琤經常揸唔同靚車返公司，然後會贈你一句：「想買？畀心機做嘢啦！」903DJ細So就踏出人生買車第二步，剛由英國買了68年MGBGT古董跑車回港：「今次真係損友累事，張繼聰不停讚佢新買嗰部古董車PAO點正點靚，另一個係王雙駿，睇見佢揸住部古董車咁鬼型，搞到我心郁郁。最後見過朋友有部開篷MG好靚，即刻搵MiniPit嘅Joe幫手喺英國搵番部類似款式，車價3,200鎊，連埋運費雜費等，使咗近10萬蚊。」新玩具雖仍未出牌，但已見細So愛不釋手，喺商台對面租咗停車場日對夜對，「家我每日都會摸下佢先安樂，間中喺停車場入面兜個圈已經好爽。最欣賞就係佢兩對側鏡嘅設計，就算Joe話我知鏡位係錯嘅，問我拆唔拆，我都嗌住唔好，就係鍾意嗰4塊鏡夠Classic。」
等老爺過招教車
大嗱嗱掏十萬元買車，點止朋友唆擺咁簡單，年紀大反而係另一因由，「以前覺得揸跑車好鬼老土，不過可能人到中年啦，哈哈，突然好想駕馭一啲嘢，但又唔夠錢買名貴跑車，所以咪決定買古董跑車囉。」自言唔識享受駕駛樂趣嘅人，發現自己揸車極限只得45分鐘，一過就會即刻眼瞓。人生第一車bB更身經百戰，經常沉唔住氣刮花碰撞，買一部唔係咁易揸嘅古董車似乎有點自討苦吃，「我係放假會去郊外踩單車同影吓相嘅人，一直好想買部假日車嘗試感受駕駛嘅樂趣，以前諗SecondCar一定係Classicmini，家就畀MG取代咗，出牌後一定帶埋支古董結他周圍去玩吓。」
表明揸車唔叻，訪問當日仲親身示範人哋撻得着部車、但佢偏偏撻唔着，要駕馭佢，細So似乎仲需要啲時間，「平時唔覺要同車溝通，今日撻唔着就發覺原來真係要慢慢同佢培養感情，其實買返嚟預咗會好好對佢，因為古董車越來越少，要識愛錫古董嘅人先好買古董，否則只會浪費。仲有，原來揸古董車嘅感覺好唔同，以往揸bB好似打機一樣咁易，但揸古董車仲要慢慢學，感覺就好似一個老人家同你講：後生仔慢慢試啦，等我教吓你嘢啦！」
68MGBGT規格
引擎：1,798cc直四
馬力：95hp/5,400rpm
傳動：四前速自動
二手價連運費：約$100,000
查詢： http://www.minipit.com
