杜拜一單疑似金融海嘯第二波，就打到市場氣氛散過「蛋散」，點知中外傳媒都大合唱力撐話係虛驚一場，市場過剩的資金又再追番貨，投資者要戴好安全帶，未來一周市況將會非常波動，特別要留意杜拜放完4日長假期後點解畫。
大震倉震走部份佳兆業（1638）孖展飛，亦令風電股龍源電力（916）孖展反應遜預期。的確，若然杜拜事件越演越烈，最擔心係市場風險胃口減少，到時會重新評估新能源股嘅估值，即使龍源係全中國最大兼世界第五大風電廠，以上限計近29倍市盈率可能被認為太貴。不過，與其坐井觀天等市場氣氛好轉，不如睇真啲龍源實力有冇得守。有留意新聞都知，佢未招股已好多人包括國壽母公司、惠理基金同寶哥哥等向佢示愛成為基礎投資者。而公司最大賣點係夠大，仲係國家國電集團嘅風電旗艦，總裝機容量達3032兆瓦。
龍源擬兩年擴產逾倍
目前中國嘅風力發力仍係起步階段，但速度就直迫美國。根據美國風電協會數字，08年美國新安裝嘅風力發電設備量達25369兆瓦；按國家能源局統計，去年底中國總裝機規模只有12170兆瓦，估計明年底將達3萬兆瓦，有望成為全球之冠。去年中國已急速增加了6300兆瓦發電產能，中美兩地已進入風電競賽時代。
龍源預期到2010年將擴產逾倍至6500兆瓦，做唔做得切係一個疑點。另外若按國家統計局2010年3萬兆瓦計劃，到時龍源市場份額可能降至21%，意味將不斷有競爭者加入市場。初步睇情況有啲似搞3G，最大贏家唔係電訊商，而係電訊設備股。至於龍源盈利能力係點，明天再續。
胡孟青