泛民幾個政黨近日為咗總辭、公投問題大傷和氣，各方堅持己見似乎冇乜轉彎餘地，噚晚終於出現轉機，有人吹雞令大家停一停、諗一諗。
吹雞嘅唔係民主派元老、大佬，而係英超球證。今日凌晨英超阿仙奴對車路士開波，係全城球迷矚目大戰，泛民當中唔少人係標準球迷，為咗專心觀戰紛紛放下爭拗，萬大事睇完波再談未遲。好似社民連陶君行同民主黨張文光咁，兩人都係曼聯躉，睇到紅魔鬼上周六4比1輕取樸茨茅夫，都掛住慶祝暫不爭論總辭問題，阿陶不諱言曼聯贏波真係令佢心情大好，與其他黨派討論政改問題，從長計議可也。
養精蓄銳通宵觀戰
今日凌晨車仔出場，民主黨李柱銘係「車」迷，相信佢寧願養精蓄銳通宵觀戰；噚晚頭場利物浦對愛華頓，捧利物浦嘅長毛當然心掛掛啦，佢噚日下晝去咗參加反高鐵、停撥款大遊行，後尾同遊行人士殺入政府總部，唔知趕唔趕得切睇波。