鄧萃雯84年開始效力無綫，過往在水銀燈下演過不同角色，可謂過足戲癮，但她表示仍恨演一些特別人物。
雯女衝口而出即有一例子：「有機會我好想演一個可以將攣男拗直嘅女人，現實生活入邊，我有大半嘅深交係男同志，我好欣賞呢啲朋友，佢哋始終唔係對我有興趣，同佢哋共處我唔擔心佢哋有機心，另一方面佢哋又對我照顧有加，大家相處會好舒服。」雯女更大讚她的同志好友都有共同特質，就是靚仔兼有品味。
選天華做攣男
不明何以雯女腦中有把攣男拗直的想法，她認真地說：「因為佢哋好正，我係女生，梗係想將好嘢益吓啲女仔。」話雖如此，她還是很尊重身邊男同志的性取向。若然真的要開一齣以拗直攣男為題材的劇集，雯女會選誰做攣男？是柴九黎耀祥還是賤Man謝天華？她說：「祥仔好man，一啲都唔似，天華雖然喺我心中都好直，但佢演戲夠放，都可以演o架。」
講到審美眼光，雯女不得不讚時裝潮人黃偉文，最近還邀請他改造自己，經過大變身的雯女，果然令人眼前一亮，她說：「我同Wyman好夾，大家都係直話直說嘅人，佢好有時裝觸覺，扮靚上畀咗我好多專業意見。Wyman唔會逼我着啲乜，佢話着件衫靚唔靚，在於你着咗有冇自信。」
讚Wyman有耐性
Wyman向來擅於mix&match，雯女說：「我最怕死板，大凡有創意，無論前衞或奇特，我乜都敢試。」雯女近日經常被拍到與Wyman出入名店，為本周五的《萬千星輝頒獎典禮2009》挑選戰衣，雯女說：「Wyman好有耐性陪我慢慢行，慢慢揀，佢真係唔話得。」
有Wyman同行掃貨，雯女荷包更慳唔少，她說：「有時我睇啱鍾意嘅嘢，但又未必合Wyman心水，佢一扁嘴，我會再三思先決定買唔買，好多時怕佢事後笑我就放棄買，都慳番好多。」