比賽從來只有勝敗。鄧萃雯的演技爐火純青，近年在無綫頒獎禮中屢敗屢戰，視后榮譽多番從手中滑過。其實有機會角逐殊榮，講真一句，誰不恨獎座到手，成為演技的最佳肯定，雯女前日也道出「有欲有求」的心底話。雖然開口埋口冇所謂，但自信的雯女，今年又有潮人Wyman相助打點戰衣，正是如虎添翼，看來這場仗，她已穩操勝券。 撰文：比華利
距離無綫《萬千星輝頒獎典禮2009》僅剩下5天，有份角逐視后的《巾幗梟雄》四奶奶鄧萃雯前日在中環接受本報專訪，心情靚爆，先後穿上型格皮褲和彩色閃片上衣，襯托得眼前的視后大熱更容光煥發。問演藝事業如日中天的雯女，現在可算無欲無求嗎？她搶白說：「我仲有欲有求o架，咁先有進步空間。以前我最大係購物欲，隨住人大咗，就減少咗好多。至於其他欲望，我好鍾意食嘢同瞓覺，點會冇欲喎。」
街坊支持最溫暖
過去幾年，雯女屢被煲成實至名歸的視后大熱，最終卻大熱倒灶，已看透遊戲規則的雯女，今年繼續抱平常心參加頒獎禮，她說：「我今年比往年更加平常心，以往最擔心係點先可以扮到最靚出席，扮靚唔係我嘅強項，女人要從頭到腳扮到好靚，真係另一門學問，今年有Wyman（黃偉文）同我分擔，我就最放心。」
雯女自言不恨奪獎：「我從來冇諗過自己攞，我可以演一套好劇，角色深入觀眾，作為演員已經賺晒。」近日雯女走在大街小巷時，均獲途人送上支持和鼓勵，她說：「佢哋開口埋口都話投咗我一票，仲話投晒《巾幗》，呢啲交流好warm，好sweet，日日有幾次陌生人同自己打氣，相對攞個獎都係一晚開心，你話邊樣開心啲？」得獎與否毫無壓力的雯女，卻恨好拍檔柴九黎耀祥能夠登上視帝寶座，她肉緊的說：「佢一定要攞。」
欣賞毛舜筠認真
雯女面對其餘14位對手，當中不少是無綫親生女，雯女卻偏偏只視以《畢打自己人》入圍的大冷門毛舜筠為勁敵，未提及次熱楊怡和黑馬佘詩曼。
雯女說：「我好睇好毛毛勝出，佢除咗係我心中嘅前輩，佢又係一位出色嘅演員，實力毋庸置疑。我同毛毛好熟，大家都合作過，我好了解佢，比我更認真更勤力。」
雯女又說：「毛毛為呢次演出好緊張，佢一向照顧家庭都無微不至，但呢次開工都忙到理唔到囡囡，對一個咁盡責嘅媽咪嚟講，佢確實付出好大，唔係好值得有回報、畀個獎佢當係少少甜頭咩？」
若然雯女今年順利摘下視后，對她來說絕對是錦上添花，問感情未見着落的她可恨同時披嫁衣雙喜臨門？她說：「感情嘅嘢要順其自然，我仲未ready好，我自細冇同家人生活，我做咗一輩子明星，家照顧番父母，我要重新學習包容同接納人哋，我呢方面未學好，跌個王子落嚟都冇用。」
學包容迎真愛
雯女希望可花多點時間關心親人，當然也會同時留意身邊合適男伴，原來她的擇偶條件很簡單，只要對她好，就比送她鑽石還珍貴：「由細到大冇要求過男伴要有錢，但最好有才華，太靚外形怕冇安全感，我覺得正就得。我家揀人謙虛咗好多，以前人哋頂唔順我，我同樣都要學識接受別人缺點，人生伴侶要走到尾，一定要明白需要對方啲乜嘢。」
現在仍是獨身的雯女，過時過節樂得與家人和朋友為伴，重拾早年失去的家庭樂，她指家人送上的關懷和溫暖，猶勝千金。
髮型：IvanLee（Headquarters）
化妝：OmixB 場地、服裝：HarveyNichols
