FamilyDay做乜好？合家歡時段最好播番套《冰河世紀3大威龍駕到》！前兩集內容唔記得唔緊要，當獨立故事來看一樣笑甩嘴。今集更會由冰村玩到落侏羅紀桃園；係唔合理，但輕鬆吓無所謂喇！
記者︰陸俊雄
繼續玩質感
睇呢類電腦動畫，畫面靚就必然，基本上同上兩集或者近期出的《沖天救兵》一樣，專睇毛毛質感點樣出色。
長毛象和樹獺的毛毛繼續靚到無嘢好講，濕身同唔濕身，都會有分別，不過我反而愛上恐龍蛋殼的質感；你話我扮認真都要講，睇片時真係拎隻真雞蛋出來比對有幾大分別，答案當然係激似啦！而且今集講到冰雪世界下有另一個世外桃園，當中更有大量恐龍，愛看爬蟲類麟片質感的朋友，可以細心品評一番。
翼龍似戰機
大人細路都啱睇，都唔會激動得去邊！《冰河世紀3大威龍駕到》突出的音效，算起來真不多；播歌、恐龍大叫不計算在內，較印象深刻是一堆疑似翼龍的飛行物，在空中追逐一段；聲音由後到前，再由左到右，包圍感不錯，直頭係卡通化的戰機山谷追逐戰，在全片的中後段出現，值得留意。
森仔配音抵死
雖然睇英文配音先夠原汁原味，不過留番自己欣賞時先聽原聲吧！
一家人睇，始終聽粵語開心好多；其實今集主角，係樹獺森仔，李琛可以話係幾個配音中最突出搞笑的一個，故事中講佢當正自己係3隻恐龍仔的媽媽，又唔怕死咁頂撞真的恐龍媽媽，夠晒以下犯上。另外新角阿北，由陸永配音也是神經質得可愛，值得留意。
