廣州車展一行，令人大開眼界，因版位所限，早前好多靚車勁車都無介紹到。「廣汽本田」嘅概念車Cabrio-Coupe，絕對係車展中滄海遺珠，雖定位為ConceptCar，不過外形絕不天馬行空，全車採用磨砂＋金屬古銅色噴油，內櫳以米色＋深啡色皮革相配，色彩效果襯得絕但仍好順眼。其硬頂開篷Coupe格局，相當有板有眼，令整體車身充滿流線美感。
車頭設計吸引但絕不過份誇張，上下鬼面罩暗藏黑色一嚿嚿入氣位，加個電鍍框同鳳眼頭燈，型到爆。由頭一直望到車尾，依然令人滿意，鼓脹高蹺尾部設計，極之誘惑迷人，珍珠白尾燈燈罩，內藏電鍍銀框，區隔開紅白黃三色燈，好別致。全架車Design我都好滿意，除咗前方一個類似細楷「a」嘅GAC廠徽，娘味甚濃，我寧願換番個Honda章算數。
記者：徐影龍