香港律師會噚日舉行兩岸四地律師高峯會，邀請行會召集人梁振英做演講嘉賓，講兩岸四地法律界如何加強合作發財。梁振英唔係律師，佢笑言自己都唔知以乜嘢身份演講，雖然八方覺得佢以「準特首候選人」身份講嘢合情合理，不過梁振英話，佢同法律界好有淵源，因為太太係律師。
梁太做律師工作係過去式，因為10年前已經冇做，專心相夫教子。講到家有賢妻，梁振英忽然有感而發，指屋企入面大小事宜，一概由太太話事，太太權力極大，佢更笑言家中行政、立法同司法三權都係由太太一手抓，可想而知邊個做莊、邊個做閒。
中央三權合作論惹非議
國家副主席習近平舊年訪港時，提出「三權合作論」，認為行政、立法同司法要互相支持，大家和衷共濟，社會先得和諧；港澳辦副主任張曉明月初喺北京出席澳門回歸10周年研討會時，亦大讚三權合作係好事，指呢方面澳門做得好，「特別是行政、立法、司法之間的關係，更多是注重相互之間的配合，更加具有建設性。」
對於「三權合作論」，香港法律界、政界人士無不嘩然，事關三權分立、互相制衡可以話係香港核心價值中之核心，領導人、幹部咁講，擺明係河水犯井水，漠視一國兩制，令香港人反感，八方雖然知道梁振英緊跟中央路線，但估唔到佢屋企已經落實三權合作。
領導人見到梁振英家庭如此「河蟹」，隨時將佢當作示範單位，成為港人楷模，千家萬戶都要學似梁太咁權霸一家，推而廣之整個社會都要一言堂，咁就天下太平。梁振英噚日冇詳細講對於太太三權一手抓有乜意見，斷估佢冇乜異議。
港律師講普通話被考起
噚日個高峯會人人要講普通話，梁振英不成問題，其他香港律師卻頭痛，貝克．麥堅時律師事務所香港主席李金鴻普通話水平媲美陳克勤講英文，「二千年來」讀成「依千靚賴」，「反過來說」讀成「飯轉賴梳」，香港人聽好有親切感，但好多人卻皺晒眉頭。
mailto:[email protected]