好地地一架豐田四門房車，點諗到居然畀人劏頂、拉長、加尾轆咁出位？錢家班將架Chaiser惡搞，為嘅係拍到更快更真實嘅飛車特技，唔好理個樣有幾騎呢，總之爾冬陞拍完《槍王之王》後都勁讚，仲燃起開拍《烈火戰車》續集嘅念頭㖭。
記者：徐影龍
攝影：譚盈傑
Model：Alia@PureModels
三年前，錢嘉樂試過將架心愛飛雞S14，分解重組成Pick-up，載住大堆攝影器材拍飛車場面。玩開有條癮，近期就向Chaiser埋手，「S14有馬力又靈活，但缺點係避震較硬，棍波起圍有太大頓挫，影響到拍攝。Chaiser就唔同，有Turbo，改埋電腦後超過300匹，負載重啲都無問題，加上自動波行車較Smooth，可增加穩定性。劏走後半車頂變農夫車後，負責操刀嘅海棠同仁哥好有腦，居然諗到增長個斗，再加多一對平常唔掂地嘅尾轆，好處係中間一對轆作基本承托，運載2、3Set拍攝器材、再加8個人超級負磅時，第三對尾轆就發揮到大大穩定車身嘅作用，拍攝極高車速時尤為重要。政府批准申請後，試過喺東廊同繞道衝到170km/h，講緊轉彎喎，直路就飆得更快，架Chaiser一樣跟到同好定，就算跑狹窄山路，都Keep到120km/h。拍完《槍王之王》後，連出名要求高嘅爾冬陞都讚，仲覺得《烈火戰車》係時候開拍續集喇。」
錢家班目前有5架拍攝專用車，另外3架係佳士拿大Pick-up、綿羊同沙灘車，經改裝後仲好系列化咁改埋KL（嘉樂）做車名，如S14就係KL14，架Chaiser就叫KL100，用埋自己名做型號，嘉樂當係親生仔咁看待。「初初見到仁哥將架車又拆又鋸，真係好心痛，只憑經驗同腦筋去改，忐忑不安好耐，直至改完同噴油拉花後，見到咁靚仔先放下心頭大石咋。」
算係改裝Chaiser發起人嘅著名飄移車手練海棠，一向係忠實Chaiser迷，性能改裝上一定勁多諗頭。「香港拍戲唔似荷李活，有咁多資源同電腦特技，家樂亦堅持唔用快鏡，錢家班靠嘅係經驗同真功夫，所以運載器材同攝影師嘅車都好講究。呢架KL100用咗半年時間去執，花費超過十萬，針對性能提升都落咗好多補品，如改電腦、冬菇等，用埋HKS儲風批，直接由Turbo進風，所以馬力提升得好勁，比原裝多100匹。仲有Billion贊助嘅InterCooler，無咁易出現因水滾而要停拍嘅窘景。」
改裝工程方面，就由有30年「駁車」經驗嘅仁哥負責，車身結構熟到爛，「我好鍾意藝術創作，聽完海棠個Idea，覺得呢個人幾天馬行空，同我好夾，幾辛苦都一個月內搞掂個車架改裝，以及第二尾擔畀佢哋做後期改裝。用上高拉力焊全部燒密，唔用點式燒焊，包保車架夠硬夠穩。而裝第三對轆最難嘅，係輪距要好準，因高速行駛時，少少偏差都有好大影響。」
