買衫係女人天性，尤其係我呢啲Shopping精，就更加鍾意捐窿捐罅搵正嘢！之不過，有時瘋狂購物同衝動消費搞到荷包大出血，其實都幾肉痛！所以近排我決定減少消費，留喺屋企對住部電腦做吓宅女。可惜坐唔夠半日，又俾我開發埋網上購物條癮……仲要一發不可收拾，但男友見我咁買法都冇話我，點解？因為平囉！
以一個較受歡迎嘅台灣購物網「皇后店」為例，無論買衫、鞋、衞衣，甚至大褸，每件單價連運費都係港幣百零蚊，個款仲要非常「韓仔」。不過講到底都係一分錢一分貨，質料始終麻麻，仲可能有少少色差，同埋等候時間一般都需要個幾兩個禮拜。如果貨品有瑕疵雖然可以更換，但就要寄返去台灣搞。
有朋友話內地「淘寶網」有唔少正嘢，尤其係童裝同BB衫，而且送貨特快，今日訂第二日就送到。但要留意係淘寶網比較多仿冒嘢，盜版貨就更加多，我自己就試過中招，好彩都係三幾百蚊，當買個教訓囉！
電郵：mailto:[email protected]