黃偉文（Wyman，簡稱阿Y）今次踩入《蘋果》潮館，演一場「Alldressup&noplacetogo」的樣板戲，聽起來好像燦爛又寂寞的煙花？視時裝為其中一樣生有可戀的事件，阿Y表示他追尋摷買着怪衫的興頭卻斷不會像煙花般消逝，反之從未興過收手之念，也悟出一個大道理：這些年來拿的原來不是時裝獎，而是寫作+人品獎，因為：「人哋鍾意你寫嘅嘢、自然慢慢亦都會鍾意你認同你，所以家就着乜都會有人留意、有人欣賞，重點原來係要先令人鍾意你、有咗觀眾緣先得！」
撰文：梁錦貞
攝影：林德雄
場地提供：Dèntro
化妝：OmixB
捱藐變Icon
黃偉文對時裝的自白：「我喺12歲已經知道自己要嘅style，我從來知道點樣可以人見人愛、做可愛嘅鄰家男孩please大家，但係我冇咁做，揀咗家條路，又冇人逼我嘅，初初梗俾人彈，都捱藐捱咗一段時間o架，所謂捱藐當然唔係出街俾人喊打，而係總係有班好似匿埋喺一個角落嘅人，唔需要負責任咁彈人，呢班人就好似家嘅網民，細個嗰陣捱藐，唔忿氣但係又唔識處理，淨係諗：態度要堅持，否則唔型！」這麼多年，型人icon名號灌頂，一早走出大直路啦？Y說：「都唔係o架，都有好多人覺得太怪o架，以前有同一班人試過彈到我一文不值，過咗10年後又嚟讚番我，其實我品味打扮根本一直冇變過！」
先攫觀眾緣
Y說：「反而我終於悟出一個大道理，呢把智慧嘅聲音係來自網上留言版嘅：『老友，你攞嘅邊係時裝獎應該係攞寫作獎至真！』咦！係喎，隨意着乜衫係獎盃獎品，而唔係你攞獎盃嘅手段，一路以嚟試過differenttry，但咁係冇感情基礎嘅，人哋極其量覺得你只係個勇敢嘅怪人，微妙嘅大道理係：做乜都假，先要人哋鍾意你、有觀眾緣先，鍾意咗你，例如鍾意睇你寫嘅嘢，之後呢把聲就硬淨夠基礎，家點樣隨意着，出力着，都會有人留意有人鍾意，多咗人欣賞，所以攞嘅應該係寫作同人品獎貼切啲。」
靚衫搵碇騷
今次Y在他的魔衣櫥中攞少少，圍繞着「Alldressup&noplacetogo」這個題目，他說：「我真係冇乜機會着呢啲衫o架咋，買嚟真係冇碇着，第一我身邊嘅朋友都係好現實嘅人，又唔係blueblood，極少搞啲主題荒唐派對，其實我唔鍾意party，係鍾意着衫啫，着到太勁太誇張搞得掂心理質素已經係一件事，仲要考慮埋身邊朋友嘅壓力。」
無意收手
「第二係我去events大多要着番品牌嘅衫，我又唔係model身材，喺有限制嘅範圍裏面揀到自己鍾意啱着又係另一種樂趣，所以買埋買埋呢啲衫點處理呢？錦衣夜行實在太可惜，多數係着嚟影相囉，好似今次MaisonMartinMargiela嚿雲，放喺邊呢？成張coffeetable咁大喎，影過相就算啦。」
買買買、着着着，有否想過夠皮收手？Y說：「點解要收手？點解會夠皮？唔通鍾意影相嘅會話影夠啦，收手啦？鍾意打網球嘅會話打夠喇，唔打喇！買衫着衫算係我生有可戀嘅其中一樣嘢，啲人成日講好停手收手，對鍾意時裝嘅人實在好唔公平！」
前瞻：期待新挑戰
「有乜未着過」是Y現時searchnew的一大動力，他說：「我係坐喺度等designers畀驚喜我嗰隻，心口直情掛住『歡迎挑戰』等你嚟！」大大大牌外，新新新牌有時更hit中他神經，當中有少少「幫到點解唔幫」的心情，他說：「家啲衫嘅價錢兩極化超嚴重，只有超好貴同中下價，係咪個個（設計師）都傾向相信花無百日紅，趁掂就衝埋呢水搶埋呢水?啲新牌子就更加難啦，有趣嘅人已經唔係咁多，好似作為醫生，你都知佢死嘅機會好大，係咪咁就連包葡萄糖水都慳番先？」
